Häzirki wagtda Türkmenistanda durmuşa geçirilýän giň gerimli durmuş-ykdysady özgertmeler medeni syýasatyň hem täze mazmun bilen baýlaşmagyna ýardam edýär. Döwlet derejesinde milli medeni mirasy gorap saklamak, dünýä jemgyýetçiligine giňden wagyz etmek, şeýle hem halkara medeni hyzmatdaşlygy ösdürmek möhüm ugurlaryň hatarynda durýar.

8-nji oktýabrda geçirilen Ministrler Kabinetiniň mejlisinde hormatly Prezidentimiz türkmen halkynyň baý medeni mirasynyň dünýäde uly gyzyklanma döredýändigini nygtap, «Türkmenistanyň medeni diplomatiýasyny ösdürmegiň 2026— 2052-nji ýyllar üçin Strategiýasyny» tassyklady. Bu giň möçberli resminama medeni diplomatiýanyň ykdysady, ykdysady däl we ynsanperwer gatnaşyklary pugtalandyrmakdaky ornuny berkitmegi maksat edinýär.

Täze Strategiýa ÝUNESKO bilen hyzmatdaşlygy giňeltmegi, taryhy-medeni ýadygärlikleri gorap saklamagy, dünýä jemgyýetçiligine has giňden tanatmagy öz içine alýar. Türkmenistan köp ýyllaryň dowamynda bu gurama bilen hyzmatdaşlykda milli medeni gymmatlyklarynyň sanawynyň giňelmegine mynasyp boldy.

Türkmenistanyň öňe sürýän halkara başlangyçlary, aýratyn-da, 2025-nji ýylyň «Halkara parahatçylyk we ynanyşmak ýyly» diýlip yglan edilmegi medeniýetiň parahatçylyk döredijilikdäki ornuny görkezýär. Ýurt giň gerimli halkara festiwallara, maslahatlara, döredijilik çärelerine işjeň gatnaşyp, TÜRKSOÝ, Bütindünýä Syýahatçylyk Guramasy hem-de Yslam Hyzmatdaşlyk Guramasy bilen hyzmatdaşlygyny giňeldýär. 2024-nji ýylyň «Pähim-paýhas ummany Magtymguly Pyragy» ýyly diýlip yglan edilmegi hem türki ýurtlaryň arasyndaky medeni aragatnaşygy pugtalandyran möhüm waka boldy.

Ýurduň syýahatçylyk kuwwatyny ösdürmek, ykdysady taýdan netijeli we durnukly syýahatçylyk nusgasyny kemala getirmek hem möhüm ugurlaryň biridir. Şeýle-de ýaşlaryň döredijilik başarnyklaryny ýüze çykarmak, täze zehinleri goldamak, döredijilik bäsleşiklerini geçirmek boýunça giň gerimli işler alnyp barylýar. Her ýyl guralýan «Türkmeniň Altyn asyry» bäsleşigi milli sungatyň ösüşine täze itergi berýär.

Medeniýet, sungat we kino pudaklarynda halkara hyzmatdaşlygy berkitmek, daşary ýurtlar bilen bilelikde çäreleri geçirmek, türkmen medeniýetini dünýä jemgyýetçiligine ýetirmek ugurlary boýunça-da giň möçberli maksatnamalar durmuşa geçirilýär. «Gorkut ata» we «Arkadagyň säheri» kinofestiwallary, şeýle hem «Galkynyş» milli at üstündäki oýunlar toparynyň üstünlikleri türkmen medeniýetiniň halkara giňişlikdäki abraýyny artdyrýar.

Strategiýa muzeýler, kitaphanalar, ýokary okuw mekdepleri bilen halkara hyzmatdaşlygy giňeltmegi, ylmy barlaglary güýçlendirmegi, neşirýat ulgamyny döwrebaplaşdyrmagy hem göz öňünde tutýar. Şeýlelikde, 2026 — 2052-nji ýyllar üçin niýetlenen bu ugurdaş meýilnamalar Berkarar döwletiň täze eýýamynyň Galkynyşy döwründe türkmen jemgyýetiniň ruhy-medeni ösüşine täze itergi berer.

Muhammetgeldi Çopanow,

S.A.Nyýazow adyndaky Türkmen oba hojalyk uniwersitetiniň uly mugallymy, tehniki ylymlaryň kandidaty.