Türkmenistanyň Ýaponiýadaky Ilçisi Atadurdy Baýramow 6-njy awgustda Hirosimada we 9-njy awgustda Nagasakide agzalan şäherleriniň atom ýaragy bilen bombalanmagynyň 80 ýyllygyna bagyşlanan çärelere gatnaşdy.

 

Çäreleriň gatnaşyjylary premýer-ministr Şigeru Işiba, Ministrler Kabinetiniň agzalary, ýolbaşçylar we parlamentiň agzalary, halkara guramalarynyň wekilleri, şeýle hem Ýaponiýada akkreditlenen diplomatik wekilhanalaryň ýolbaşçylary boldylar.

 

Ýatlama çärelerinde ýadro ýaragyny ulanmakdan ýüz öwürmek we halkara jedelleriň soňlanmagy meselelerine üns berildi. Hirosima we Nagasaki şäherleriniň ýolbaşçylary döwlet baştutanlaryny dialog arkaly gurlan ynanyşmaga esaslanýan howpsuzlyk düzümlerini döretmäge çagyrdy.

 

Hirosima we Nagasakide geçen çäreleriň netijeleri boýunça beýleki meseleler bilen bir hatarda Parahatçylyk Jarnamasy kabul edildi we Ýapon Hökümetini Ýadro ýaragyny gadagan etmek hakynda şertnama gol çekmäge we tassyklamaga hem-de 2026-njy ýylda Ýadro ýaragyny gadagan etmek hakynda şertnamasynyň ýerine ýetirilişine gözegçilik etmek boýunça maslahatynda dünýä liderlerini ýadro ýaragyny ýok etmek boýunça anyk ýol kartasyny hödürlemäge çagyrdy.

 

Çeşme: Türkmenistanyň Daşary işler ministrligi