Laramy, Waýoming ştaty — 2025-nji ýylyň 24-nji oktýabry. ABŞ-daky Türkmenistanyň Ilçihanasynyň başlangyjy we guramaçylygy bilen Waýoming uniwersitetiniň kampusynda Türkmenistanyň hemişelik bitaraplygynyň 30 ýyllygyna bagyşlanan dabaraly prezentasiýa geçirildi. Çärä uniwersitet ýolbaşçylary we professor-mugallymlar, halkara bölümleriň işgärleri we uniwersitet myhmanlary ýygnandylar. Doly zal we diňleýjileriň işjeň gatnaşmagy bitaraplyk temasynda ýokary gyzyklanma bardygyny, onuň häzirki zaman parahatçylyk we ynam guraly hökmünde ähmiýetini görkezdi.

Türkmen tarapyny ýokary okuw mekdepleriniň wekilleri tanyşdyrdy. Çärä gatnaşyjylara gysgaça söz bilen Türkmenistanyň Bilim ministriniň orunbasary Azat Ataýew we ABŞ-daky Türkmenistanyň Ilçihanasynyň ilkinji sekretary-konsuly Şohrat Pirmuhammedow ýüzlendiler. Esasy hasabat bilen D. Azady adyndaky Türkmen milli dünýä dilleri institutynyň ylmy işler boýunça prorektory Selbi Batyrowa, “Türkmenistanyň hemişelik bitaraplygy: 30 ýyllyk parahatçylyk we diplomatiýa” atly prezentasiýa bilen çykyş etdi. Öz çykyşynda ol Türkmenistanyň bitaraplyk statusynyň taryhy esaslaryny we halkara-hukuk taýdan ykrar edilmegini, öňüni alyş diplomatiýasy we ynsanperwer hyzmatdaşlykda proaktiw roluny, şeýle hem ABŞ-da – akademik jemgyýetiň däpden gepleşige we düşünişmäge açyk bolan ýurtda – baýramçylyk çäresiniň geçirilmeginiň nyşanasydygyny nygtady.

Hasabatyň soňunda sorag-jogap sessiýasy geçirildi. Çärä gatnaşyjylary bitaraplygyň sebit hyzmatdaşlygyndaky amaly taraplary, ynamlylygy we durnukly ösüşi berkitmekdäki goşandy, şeýle hem jemgyýetçilik diplomatiýasy we medeni alyş-çalyş mümkinçilikleri gyzyklandyrdy. Diskussiýa geljekki aragatnaşyk we bilelikdäki açyk başlangyçlar üçin giň mümkinçilikleriň bardygyny görkezdi.

Prezentasiýany tematik sergi dowam etdirdi. Myhmanlara hemişelik bitaraplygyň esaslandyrylyşynyň esasy tapgyrlary, halkara basgançaklary we häzirki zaman ynsanperwer taslamalary barada wizuall görkezmeleri berildi. Myhmanlar ekspozisiýanyň düşnükliligine we mazmunyna ýokary baha berdiler we düşündiriş we jemgyýetçilik çärelerinde ulanmak üçin stendleriň we bukletleriň elektron nusgalaryny soradylar.

Waýoming uniwersitetiniň wekilleri Türkmenistanyň hemişelik bitaraplygynyň hyzmatdaşlyk, gepleşik we parahatçylyk üçin netijeli platforma bolup durýandygyny, ABŞ-da giň köpçülige düşündirilip, gyzyklanma döredýändigini bellediler.

Çeşme: Türkmenistanyň Bilim Ministrligi