Türkmenistanyň demir ýol ulaglary ministri Mämmed Akmämmedowyň ýolbaşçylygyndaky wekiliýet 2025-nji ýylyň 6-njy sentýabryndan 8-nji sentýabry aralygynda Eýrana iş saparyny amala aşyrdy. Saparyň maksady demir ýol pudagynda ikitaraplaýyn hyzmatdaşlygy giňeltmekden ybarat boldy.

Saparyň dowamynda türkmen wekiliýeti Eýranyň ýokary derejeli resmileri, ýagny ýol we şäher gurluşygy ministri Farzane Sadeg we onuň orunbasary Jabar-Ali Zakeri bilen duşuşdy. Olar şeýle-de, wagon dolandyryş merkezine baryp gördüler we Tähranda ýerleşýän «Aprin» gury portunyň mümkinçilikleri bilen tanyşdylar.

Duşuşyklarda taraplar söwda-ykdysady gatnaşyklary işjeňleşdirmegiň we tranzit ýük daşamalarynyň möçberini artdyrmagyň ýollaryny ara alyp maslahatlaşdylar. Esasy halkara ugurlara aýratyn üns berildi, ýagny Hytaý-Gazagystan-Türkmenistan-Eýran demir ýoly we «Aşgabat ylalaşygy» halkara geçelgesi (Özbegistan, Türkmenistan, Eýran, Oman).

Gepleşikleriň netijesinde, Ykdysady Hyzmatdaşlyk Guramasyna (YHG) agza ýurtlaryň arasyndaky haryt dolanyşygyny artdyrmak maksady bilen, hyzmatdaşlygy giňeltmek barada ylalaşyk gazanyldy. Şeýle-de, Ermenistan-Eýran-Türkmenistan-Gazagystan ulag geçelgesini netijeli peýdalanmak meselesi hem gozgaldy.

Mundan başga-da, wekiliýetler Akaýla-Inçeburun serhet demir ýol geçelgesine baryp, ol ýerde alnyp barylýan işleriň gidişi bilen tanyşdylar.

çeşme: Türkmenistanyň daşary işler ministirligi