Türkmenistanyň Mejlisiniň we Özbegistanyň Oliý Majlisiniň parlamentara dostluk toparlarynyň agzalary 23-nji iýulda wideoaragatnaşyk arkaly duşuşyk geçirip, iki ýurduň arasynda parlamentara hyzmatdaşlygyň geljegi baradaky pikir alyşdylar.

 

Taraplar häzirki ýagdaý we parlamentara dialogyň mümkinçilikleri boýunça pikir alyşdylar. Duşuşyga gatnaşyjylar döwlet Baştutanlarynyň tagallasy bilen soňky ýyllarda Türkmenistan bilen Özbegistanyň arasyndaky dostlukly gatnaşyklaryň has-da pugtalanýandygyny, bu ýagdaýyň syýasy, ykdysady we medeni-ynsanperwer ugurlarda köpugurly hyzmatdaşlygyň ýola goýulmagyna ýardam edýändigini bellediler.

 

Deputatlar parlamentara dialogyň iki döwletiň hyzmatdaşlygynyň çuňlaşmagynda aýrylmaz bölekdigini nygtadylar. Iki ýurduň arasynda parlamentara dostluk toparlarynyň döredilmegine aýratyn üns berildi, bu bolsa kanunçylyk işinde tejribe alyşmak hem-de parlament diplomatiýasynyň ösdürilmegi üçin giň mümkinçilikleri döredýär.

 

Duşuşygyň dowamynda halkara guramalaryň çäklerinde hyzmatdaşlygyň giňeldilmeginiň, kanun çykaryjylyk tejribesiniň alyşylmagynyň we bilelikdäki çäreleriň geçirilmeginiň ähmiýeti nygtaldy. Taraplar döwletara hyzmatdaşlygyň parlament diplomatiýasy arkaly goldanylmagyna we ikitaraplaýyn gatnaşyklarynyň hukuk esaslarynyň pugtalandyrylmagyna taýýardygyny beýan etdiler.

 

Duşuşyga gatnaşanlar iş saparlarynyň we duşuşyklaryň guralmagynyň parlamentara gatnaşyklaryň ösdürilmeginde uly ähmiýete eýedigini bellediler.

 

Çeşme: Türkmenistanyň Mejlisi