22-nji iýulda Duşenbe şäherinde geçirilen Merkezi Aziýa Ykdysady Forumynyň (MAYF-2025) çäklerinde «Sebitleýin ynam, hyzmatdaşlyk we dostluk giňişligini döredýäris» atly umumy mejlisde Türkmenistanyň Maliýe we ykdysadyýet ministriniň orunbasary Babanyýaz Ýalakow çykyş etdi.

 

Foruma Merkezi Aziýa ýurtlaryndan we Russiýadan hökümet hem-de işewür toparlarynyň wekilleri gatnaşdylar. Gatnaşyjylar ulag geçelgelerini we sanly platformalary ösdürmek, senagatda we oba hojalygynda innowasion tehnologiýalary ulanmak meselelerini ara alyp maslahatlaşdylar.

 

Sanly ykdysadyýetde, logistika ulgamynda, senagat hyzmatdaşlygynda, ýaşlar we bilim ulgamynda alyş-çalyş babatda hyzmatdaşlygyň anyk ugurlary ara alnyp maslahatlaşyldy. Ynsanperwer hyzmatdaşlygyň hem-de rus dilini ýaýbaňlandyrmagyň orny aýratyn bellenildi.

 

Umumy mejlisiň netijeleri boýunça taraplaryň ykdysady integrasiýany has-da çuňlaşdyrmaga, söwda-ykdysady gatnaşyklaryň gerimini giňeltmäge hem-de global wehimlere garşy bilelikde çykyş etmäge bolan islegini tassyklaýan Bilelikdäki Jarnama gol çekildi.