Türkmenistanyň küşt boýunça ýygyndy topary ýetginjek oglanlaryň we gyzlaryň arasynda geçirilen 29-njy iýulda Gyrgyzystanyň Çolpon-Ata şäherinde tamamlanan Merkezi Aziýa çempionatynda umumy toparlaýyn hasapda ikinji orny eýeledi. Türkmenistanly türgenler sebitleýin ýaryşlarda ýokary taýýarlyk derejesini görkezmek bilen, jemi alty medal gazandylar.

 

Milli ýygyndynyň düzüminde 15 küştçi çykyş etdi. Olar Merkezi Aziýanyň bäş ýurdundan 425 türgen bilen 12 ýaş derejede bäsleşdiler. Türkmenistanlylar öz hasabynda 2 altyn, 3 kümüş we 1 bürünç medal gazandylar.

 

Altyn medallary Aşgabatdaky 8 ýaşa çenli oglanlaryň arasynda çykyş eden «Küşt älemi» akademiýasynyň türgeni Çaryýew Çaryhekim (9 mümkin utukdan 8 utuk) we 8 ýaşa çenli gyzlaryň arasynda çykyş eden Mary welaýatyndan Çaryýewa Anna (7,5 utuk) gazandy.

 

Kümüş medallary Lebap welaýatyndan Öwlagulyýew Maksat (10 ýaşa çenli oglanlar, 7,5 utuk), Mary welaýatyndan Batyrow Alihan (12 ýaşa çenli oglanlar, 7 utuk) hem-de Lebap welaýatyndan Rejepowa Jahan (16 ýaşa çenli gyzlar, 7,5 utuk) aldy. Bürünç medaly 14 ýaşa çenli gyzlaryň arasynda cykyş eden Lebap welaýatyndan Myradowa Nebahat gazandy.

 

Toparlaýyn hasapda birinji orny 16 medal bilen Özbegistanyň ýygyndysy eýeledi. Ýaryşyň öý eýesi Gyrgyzystan altyn medallaryň sany deň bolmagyna garamazdan kümüş medallaryň sany boýunça Türkmenistandan yzda galyp, üçünji orna mynasyp boldy.