Ýaponiýanyň Osaka şäherinde geçirilýän EXPO-2025 Bütindünýä sergisinde Türkmenistanyň pawilýony bir millionynjy myhmanyny kabul etmek bilen möhüm sepgide ýetdi. Bu barada türkmen ekspozisiýasynyň wekilleri habar berdiler.

 

«1 000 000 myhman – Sag bolsun, Ýaponiýa! Biz bu gün örän ajaýyp pursada ýetdik – 1 million myhman! Olaryň her biri türkmeniň däp-dessurlary, myhmansöýerligi we medeniýeti bilen garşylandy. Bu pursat adamlar arasyndaky gatnaşyklaryň güýjüni ýatladýar. Biz ýene-de köp myhman bilen duşuşmaga sabyrsyzlyk bilen garaşýarys!» – diýip, ekspozisiýanyň guramaçylary bellediler.

 

Üç gatdan ybarat pawilýon «Belli» hojalyk jemgyýeti tarapyndan bina edildi. Binanyň arhitektura konsepsiýasy Türkmenistanyň medeni mirasyny döwrebap tehnologiýa çözgütleri bilen utgaşdyrýar.

 

Birinji gatda giň gerimli sferiki ekran we wirtual syýahat üçin multimedialy installýasiýalar bilen baýlaşdyrylan immersiw giňişlik ýerleşýär. Ikinji gatda energiýa, senagat, saglygy goraýyş, bilim, sport we ylym ulgamlaryndaky üstünlikler görkezilýär, şeýle hem däp bolan türkmen lukmançylygynyň dermanlyk ösümlikleri bilen tanyşdyrylýar.

 

Üçünji gat medeniýet merkezi hökmünde hyzmat edýär. Bu ýerde hakyky türkmen halylary, däp bolan nagyşlar we muzeý eksponatlary ýerleşýär. Şeýle hem, türkmen milli tagamlaryny hödürlenýän restoran hereket edýär.

 

EXPO 2025 Bütindünýä sergisi 13-nji aprel – 13-nji oktýabr aralygynda Osaka aýlagyndaky emeli Ýumeşima adasynda “Geljegimiziň jemgyýetini bilelikde döredýäris” şygary astynda geçirilýär. Türkmenistanyň Milli güni 14-nji aprelde bellenildi. Şol gün pawilýony Türkmenistanyň Prezidenti Serdar Berdimuhamedow baryp gördi.