23-nji oktýabrda Özbegistan Respublikasynyň Turkmenistandaky Ilçihanasynda syýahatçylygy ösdürmek we türkmen turoperatorlaryny bilelikdäki hyzmatdaşlyga çekmek barada brifing geçirdi. Diplomatik missiýanyň ýolbaşçysy Rawşanbek Alimov Özbegistanyň syýahatçylyk pudagynyň häzirki üstünlikleri barada gürrüň berdi we türkmen hyzmatdaşlaryny işjeň hyzmatdaşlyk etmäge çagyrdy. Bu barada Takyk saýtynyň korrespondenty habar berdi.

Ilçiniň sözlerine görä, ÝUNESKO-nyň Bütindünýä miras sanawyna girizilen Samarkand, Buhara, Hywa we Şahrisabz şäherleri Gündogar siwilizasiýasynyň nyşanlaryna öwrülen binagärlik ýadygärlikleriniň, medreseleriň, kümmetleriň, kerwensaraýlaryň we metjitleriň öýidir.

"Häzirki wagtda Özbegistan diňe bir däp bolan taryhy we medeni ýollary däl, eýsem ýurdy iň dürli nukdaýnazardan açyp görkezýän täze syýahat formatlaryny hem hödürleýär" - diýip, Alimov aýtdy.

Şularyň arasynda ilçi ýaşyl we ekoturizmi, etnografiki syýahatçylygy, zyýarat syýahatçylygyny, başdan geçirmeler we ekstremal syýahatçylygy, şeýle hem gastronomik syýahatçylygy belläp geçdi.

lçi 2025-nji ýylyň başyndan bäri Özbegistana 8,6 million daşary ýurtly syýahatçynyň gelendigini we häzirki wagtda ýurduň her aýda takmynan 1 million syýahatçy kabul edýändigini belledi.

Bu maglumatlary beýan edip, Alimov türkmen syýahatçylyk kompaniýalaryny we maýadarlaryny döwletiň salgyt we gümrük ýeňillikleri ýaly amatly şertleri döreden Özbegistandaky iri möçberli taslamalara gatnaşmaga çagyrdy. Olar myhmanhanalaryň, dynç alyş zolaklarynyň we ulag merkezleriniň gurluşygyny öz içine alýar.

Diplomatiki missiýanyň ýolbaşçysy şeýle hem Hywa-Künýa-Ürgenç-Aşgabat-Mary-Buhara serhetüsti syýahatçylyk ýolunyň döredilmegini ileri tutulýan ugur hökmünde görkezdi. Şeýle hem, ol 27-29-njy noýabrda geçirilmegi meýilleşdirilýän Daşkent halkara syýahatçylyk ýarmarkasyna gatnaşmaga türkmen hyzmatdaşlaryny çagyrdy.

Diplomat Türkmenistan bilen Özbegistanyň arasyndaky gatnaşyklaryň hoşniýetli goňşuçylyk, özara ynam we strategik hyzmatdaşlyk bilen häsiýetlendirilýändigini, syýahatçylygyň ösüşiň hereketlendiriji güýji we jemgyýetçilik diplomatiýasyny ösdürmek üçin gural bolup hyzmat edýändigini nygtady.