2025-nji ýylyň 21-23-nji awgusty aralygynda türkmen paýtagtynda «Kids Expo: çagalar üçin ähli zat» atly halkara köpugurly sergi-ýarmarkasy geçiriler. Bu çäre çagalar üçin niýetlenen önümler we hyzmatlar pudagynda möhüm waka öwrüler.

Sergi çagalar hyzmatlary ulgamynda işleýän kompaniýalara innowasion önümleri we hyzmatlary bilen tanyşdyrmaga, täze bazarlara çykmaga hem-de bu ugurda möhüm hyzmatdaşlar bilen gatnaşyk gurmaga mümkinçilik döreder.

«Kids Expo: çagalar üçin ähli zat» atly halkara sergi-ýarmarkanyň çäklerinde dürli ýaşdaky çagalara niýetlenen bäsleşikler we gyzykly çäreler guralar — çagalar egin-eşikleriniň görkezilişi, multfilm görkezilişi, çagalara we ýetginjeklere niýetlenen işewür sessiýalar, ene-atalar üçin duşuşyk, 6-12 aýlyk bäbekleriň arasynda emekleme ýaryşy.

Sergide çagalara bilim bermekde ulanylýan innowasion tehnologiýalar; mekdep esbaplary (kanselýariýa, çagalar mebeli); täze doglan bäbekler üçin önümler; çagalar edebiýaty we okamak; oýunjaklar we kämilleşmek boýunça gollanmalar; çagalaryň durmuşynda saz, tans we sungat bilen bagly önümler görkeziler.

Sergi Türkmenistanyň Söwda-senagat edarasynyň binasynda geçiriler. Ol sagat 09:00-dan 18:00-a çenli myhmanlar üçin açyk bolar.

Çeşme: https://kids.turkmenexpo.com/