Aşgabatdaky Daşky gurşawy goramak ministrliginde Türkmenistanyň Köýtendag we Özbegistanyň Surhan döwlet tebigy goraghanalarynyň ÝUNESKO-nyň Bütindünýä mirasynyň sanawyna bir bitewi serhetara bilelikdäki obýekti hökmünde hödürlenmegini taýýarlamaga bagyşlanan halkara duşuşyk geçirildi.

Çärä Germaniýanyň Mihael Zukkow gaznasynyň, ABŞ-nyň Conservation X Labs guramasynyň, Slowakiýanyň Speleologiýa jemgyýetiniň hem-de Türkmenistanyň we Özbegistanyň degişli edaralarynyň wekilleri gatnaşdy. Duşuşygyň netijesi hökmünde Niýetnamalar baradaky Jarnama kabul edildi, Ýol kartasy tassyklanyldy we ÝUNESKO-nyň Bütindünýä Miras Konwensiýasynyň degişli bahalandyrma ölçegleri kesgitlenildi.

Obýekt “Köýtendag gerşiniň karstlary, gowaklary we kanýonlary” atly umumy at bilen ÝUNESKO-nyň Deslapky Sanawyna girizildi. Bu at sebitdäki geologik we biologik mirasyň aýratynlygyny açyp görkezýär. Taslama boýunça işler 2015-nji ýyldan bäri alnyp barylýar, onuň bilelikdäki görnüşine geçmegi bolsa halkara hünärmenleriň teklipleriniň netijesi boldy.

Köýtendag gerşi dinozawrlaryň yzlary, seýrek duşýan karst şekilleri, çuň gowaklar we kanýonlar bilen tanalýar. Şeýle-de, bu ýerdäki günbatar marhury, Buhara aýragy (dag goçy), bürgüt ýaly ýyrtyjy guşlary we diňe şu ýerde ýaşaýan täsin Köýtendag kör gowak balygyny goramak meselelerine aýratyn üns berilýär.