Türkmenistanyň ýokary okuw mekdepleriniň talyplary 28-nji iýuldan 30-njy awgust aralygynda Germaniýanyň akademiki alyş-çalyş gullugynyň (DAAD) maksatnamasynyň çäginde guralan nemes diliniň tomusky kurslaryna gatnaşýarlar.

Dalaşgärleriň deslapky saýlanmagyndan soň, Türkmenistandaky 8 uniwersitetiň 11 talyby Germaniýada dil tejribe işine gatnaşmak hukugyny aldy.

Talyplar üçin bilim çäreleri, Germaniýanyň öňdebaryjy uniwersitetleriniň birnäçesinde tejribeli hünärmenler tarapyndan häzirki zaman usullaryny ulanmak arkaly geçirilýär. Tejribe gatnaşyjylary hünär ukyplaryny we tejribelerini çuňlaşdyrmaga we giňeltmäge, dil bilimlerini we aragatnaşyk endiklerini baýlaşdyrmaga gönükdirilen manyly sapaklara gatnaşýarlar.

Maksatnamanyň çäginde talyplar diňe bir nemes dilini bilmek bilen çäklenmän, Germaniýanyň taryhy we medeniýeti bilen içgin tanyşýarlar. Türkmen talyplarynyň tomusky dil kurslaryna gatnaşmagy Türkmenistan bilen Germaniýanyň arasynda ylmy we bilim hyzmatdaşlygynyň hasam giňelmegine goşant goşar.

 

Çeşme: “Türkmenistan: Altyn asyr” elektron gazeti